‘ಆಧುನಿಕತೆಯ ವಿಕಾರಗಳಿಗೆ ದೇಸಿ ಉತ್ಪನ್ನಗಳ ಬಳಕೆಯೇ ಮದ್ದು’  ಅಂಬಾರ ಚಿತ್ತಾರದ ಮುಖ್ಯಸ್ಥ ಎನ್. ಎಂ. ಕುಲಕರ್ಣಿ ಅಭಿಮತ

      ಪರಿಸರ ಮತ್ತು ನಮ್ಮ ಆರೋಗ್ಯಕ್ಕೆ ಕಂಟಕವಾಗಿರುವ ಕೆಲವು ಆಧುನಿಕತೆಯ ವಿಕಾರಗಳನ್ನು ಸಿನಿಕತನದ ಗೊಣಗಾಟಗಳಿಂದ ಪರಿಹರಿಸಲು ಸಾಧ್ಯವಿಲ್ಲ. ನಮ್ಮ ದೈನಂದಿನ ಬದುಕಿನಲ್ಲಿ ನಿಸರ್ಗಕ್ಕೆ ಹಾನಿ ಮಾಡದೆ ಸ್ಥಳೀಯವಾಗಿ ತಯಾರಾದ ಉತ್ಪನ್ನಗಳನ್ನು ಬಳಸುವುದೇ ಇದಕ್ಕಿರುವ ಪರ್ಯಾಯ ಮಾರ್ಗ ಎಂದು ‘ಅಂಬಾರ ಚಿತ್ತಾರ’ ಕರಕುಶಲ ಸಿದ್ಧ ಉಡುಪು ಘಟಕದ ಮುಖ್ಯಸ್ಥರಾದ ಶ್ರೀ ಎನ್. ಎಂ. ಕುಲಕರ್ಣಿ ಅವರು ಪ್ರತಿಪಾದಿಸಿದರು. ನಗರದಲ್ಲಿ ಆರಂಭವಾದ ದೇಸಿ ಉತ್ಪನ್ನಗಳ ಕೇಂದ್ರವಾದ “ದೇಸಿ ಸಂಸ್ಕೃತಿ”ಯ ನೂತನ ಮಳಿಗೆಯನ್ನು ಉದ್ಘಾಟಿಸಿ ಅವರು ಮಾತನಾಡುತ್ತಿದ್ದರು. ಇತ್ತೀಚಿನ ವರ್ಷಗಳಲ್ಲಿ ಜನರು ಮತ್ತೆ ದೇಸಿ ಉತ್ಪನ್ನಗಳತ್ತ ಮರಳುತ್ತಿರುವುದು ಆಶಾದಾಯಕ ಬೆಳವಣಿಗೆ ಎಂದು ಅವರು ಅಭಿಪ್ರಾಯಪಟ್ಟರು.